小時候，阿媽曾經告訴我，嬰兒是從母親的格肋底跌出泥的。
這是半世紀前的標準性教育。
當時的我雖然年紀小，但並不是傻的。個個女人舉起隻手就跌個BB出泥，仲成世界？我完全覺得我阿媽亂up廿四老點我。
N年後，我才發現這說法源自2500多年前的印度。
摩耶夫人回娘家待產途中，經過藍毗尼花園，看見無憂樹的花正開得燦爛，想伸手去採摘時，佛陀就從夫人的格肋底跌左出泥。
又双叒啜N年後，我第一次去到柬埔寨，在金邊博物館內看到這種花，有人告訴我這就是無憂樹，佛陀就在這樹下出生。我非常興奮，第一時間舉高個格肋底與此花合照。
之後去到泰國，新加波，緬甸等東南亞國家，都會見到這種無憂樹。
每次看見這種花，我都會記起我阿媽老點我、格格底、柬埔寨、摩耶夫人和佛陀。
這是一棵充滿回憶的花樹。
所以當我發現迪欣湖竟然，竟然！種有無憂樹時，我就不顧一切跑去看了。
真係神奇，我冇諗過可以係香港見到無憂樹的花。等它結果後，我會再去看。
ps, 幾年前，唔知幾時開始，有人說無憂樹是另一種小小的橙黃色的花，長在高樹之上。我問過D道行好高的同事，邊種先係真正的無憂樹？果位同事竟然反問我點解要花心思去追查？佢話我中意邊棵係邊棵就係無憂樹。。。我即時O左。我，覺得，個人認為，東南亞果D先係無憂樹，因為佢D花高高低低都有生，非常touchable。而橙黄細花果種，生到三樓咁高，摩耶夫人點摘呀？
Comments
Post a Comment